睇完呢張相 就知曼城做硬3冠王

2019年05月17日 21:00
東網電視
更多新聞短片
(互聯網)

曼城今季於英超有驚無險,去到最後一輪聯賽以4:1大勝白禮頓,於連勝14場聯賽嘅情況下,全季積98分,以1分之微力壓利物浦成功衞冕英超冠軍。連埋早前已經落袋嘅英聯盃,藍月亮本季已係雙冠王,到周六深夜上演嘅英足盃決賽,曼城將鬥屈福特,藍月亮大有機會成為3冠王。

計實力同經驗,曼城遠於屈福特之上,如果藍月亮意外落敗,老實都係輸自己,只係怕慶祝得太開心,未能於決賽打出水準,輕敵下爆冷失冠。不過睇番呢張相,曼城球迷可以放一萬個心。4:1擊敗白禮頓後,曼城英超稱王,成班波當然興奮到癲,球員仲涉嫌於回程飛機上大唱反利物浦歌曲;但原來嗰陣哥迪奧拿一啲都冇放鬆到,雖然腳邊已有一座聯賽冠軍獎盃,但佢依然睇住個電腦、專心分析緊剛啱一場賽事嘅表現優劣。哥迪奧拿被唔少球評家評為「戰術癡漢」,的確唔係浪得虛名,有佢喺度帶住班波,曼城球員想唔專心都難。