雙冠王都要炒教練　高華真係陰功豬

唔止足球睇波，仲有24小時滾動賠率，即時體驗：https://bit.ly/2UmNL0L　

歐洲球壇癲晒喇！之前有傳出過，車路士就算贏歐聯，都一樣會炒教練沙利；至於祖雲達斯又衞冕意甲，但主帥阿里基一樣「分手」走人，又例如英超白禮頓護級成功，咪又係炒咗領隊曉頓......講到呢度，當德甲班霸拜仁慕尼黑，仲有機會做本地雙冠王，卻又突然傳出，無論佢哋攞咩成績，主帥尼高高華都要下台，似乎都唔需要再覺得驚訝啦！

其實德國傳媒有呢個報道，都未算太令人意外，事關上年暑假先上任拜仁主帥一職嘅尼高高華，季初戰績平平，已經有唔少質疑佢夠唔夠料教拜仁。到之後拜仁喺歐聯畀利物浦淘汰出局，高華自然更加係孭晒大鑊啦！

雖然話嚟緊拜仁喺德甲煞科戲只要唔輸就攞硬冠軍，然後5月25日就會硬撼RB萊比錫爭德國盃冠軍，仲有機會做雙冠王，不過有報道就話，拜仁高層已經對尼高高華失去信心同耐性，希望季尾掃佢走。報道仲話，拜仁高層對高華不滿仲包括訓練單調、喺更衣室失去控制力，而喺不敵利物浦之戰，高華嘅戰術修為更被指非常低級，缺乏彈性，根本不足以統領拜仁咁話。

事關上，拜仁CEO路明尼加本身已經對高華唔多欣賞，更麻煩係會長漢尼斯近排睇法都開始支持路明尼加咁話，總之簡單一個字講晒：「炒硬！」至於高華嘅接替人選，家陣傳得最勁係曾效力拜仁嘅荷甲燕豪芬教練雲邦美，而阿積士主帥坦赫治亦係考慮之列。