【有片】世紀誤審 過晒白界球證判唔入

2019年05月18日 07:00
東網電視
更多新聞短片
(互聯網)

《彩報》豪裝,入市即贏!撳撳呢條Link,寶藏等你拎:http://win.on.cc/football/ 

周五(17日)日職浦和紅鑽主場2比3輸畀湘南比馬出現一個鬼波!湘南一個毫無爭議嘅入球,居然畀球證夾硬宣布無效,令日本傳媒嘩然,認為係一次「世紀大誤審」,被形容「喺J聯賽史留下一個『No goal』離奇判決」!

件事發生喺上半場31分鐘,當時浦和紅鑽憑長澤和輝、納博特各建一功領前兩球。湘南比馬中場5號杉岡大暉接到梅崎司傳送,禁區頂左腳勁射中右柱,再反彈去左邊網仔,然後又彈返出龍門口,畀浦和門將西川周作接番,但係個波明顯入晒白界。

當現場人人以為湘南追返一球,繼續有好戲睇,球證山本雄大居然認為個波係中兩條柱彈出,裁定「No goal」!湘南班職球員自然嘈到拆天,不過山本雄大一於少理,結果浦和領先2比0返更衣室。

可能因為太過委屈,湘南班人下半場咬緊牙關大爆發,靠菊地俊介梅開二度,加埋山根視來補時4分鐘嘅絕殺,以3比2反勝浦和紅鑽,打咗場爭氣勝仗。事後有日本媒體亦繼續寸個球證之餘,大字標題話「湘南入咗4球,但就只能夠逆轉贏3比2」。

日職聯賽會主席村井滿、國家隊主帥森保一都係今場嘅座上客,佢哋自然O晒嘴,森保承認呢個判決「令人難以置信」。對於係咪應該盡快引入VAR,村井滿話要達到FIFA嘅標準,需要培養一批人才,咁樣係需要時間嘅,但係佢透露「考慮先行引入門線技術」。