【人物誌】巴西鋼門獲神感召　足總盃後做牧師

港網 No.1 24小時足球賠率：https://bit.ly/2UmNL0L　

周六(18號)英格蘭足總盃決賽，將會係屈福特老牌門神靴里奴高美斯足球生涯終極一戰，呢位38歲巴西門將喺英超打滾逾10年，依家雖然只係屈福特2號門將，但球隊殺入足總盃決賽之路，靴里奴高美斯每一場都擔任正選，決賽極可能會繼續正選披甲，如果可以用冠軍作為告別禮物，將會係童話式結局。

曾代表巴西國家隊上陣14次嘅靴里奴高美斯，一向係虔誠嘅基督教徒，佢表示退休之後將會做足球經理人，同時會接受「神的感召」做牧師幫助世人，佢話：「我感應到神嘅感召，呢個感覺最近更加強烈，神會話畀我聽之後應該去邊同做啲乜，我好可能會返老家(巴西)，但我又想去世界唔同地方幫助有需要嘅人。」

回首過去，靴里奴高美斯表示佢嘅足球生涯並無遺憾：「我對自己足球事業冇任何投訴，我初我只係想踢波賺錢畀媽媽買一間屋，而神就畀咗我一個足球事業。」靴里奴高美斯2002年喺巴西高士路出道，03年贏過巴甲聯賽冠軍，之後轉投燕豪芬更加實現荷甲4連霸(05年、06年、07年、08年)，不過之後轉戰英超效力熱刺同屈福特都冇贏過任何冠軍，今場告別戰有機會實現「零的突破」。