跆拳世錦賽超黑哨 中國鄭姝音失金喊爆

20190518
東網電視
更多新聞短片
中國奧運金牌選手鄭姝音,痛失世錦賽金牌。(互聯網)
跆拳道世錦賽驚現爭議賽果,16年里約奧運金牌得主、中國跆拳好手鄭姝音,縱然決賽中於分數上大幅領先對手,但於比賽即將結束時,東道主英國選手禾頓多次出術用手推鄭姝音出界,裁判反判鄭姝音10次犯規、即時判佢落敗,禾頓戲劇性贏得金牌。鄭姝音之後失聲痛哭,上頒獎檯時更失望到跪咗喺度。現時觀眾都不值禾頓所為,勁噓呢名主場選手,並大叫「China、China」支持鄭姝音。而現場嘅其他參賽團隊都不斷安慰鄭姝音,認為佢呢個世界冠軍,係被禾頓同裁判偷走了。
16年鄭姝音爆冷贏得奧運73公斤級或以上級別金牌,4強時就係擊敗禾頓。禾頓之前曾2次奪得世錦賽金牌,今次戰勝鄭姝音,令佢第3次成為世界冠軍。鄭姝音於決賽中面對禾頓,明顯取得優勢,於比賽最後階段大幅度領先20:10,呢塊金牌基本上已袋落袋。技術上無法贏到鄭姝音,禾頓最終選擇另類方式奪金,佢不斷用手狂推對手,令鄭姝音跌出界,裁判對佢犯規動作視若無睹,到比賽結束前,判夠鄭姝音10次犯規,直接判呢名中國好手落敗。
鄭姝音知道自己咁樣輸後,於賽場上跌坐在地,擰晒頭表示不敢相信。到企起頒獎檯時,鄭姝音開始支持唔住,再次跪倒地下。現場觀眾雖然多數係英國人,但都睇唔過眼禾頓咁樣贏,開始狂噓呢名主場選手。
賽後鄭姝音表示:「領獎時候我感覺暈眩,有點站不住。他們的國歌響起來,我突然覺得對不住中國。從練體育的第一天起,就知道競技體育沒有絕對公平,但我練了16年跆拳道,今天才知道比賽有這樣的,我拜託他們能不能公平些?今天的結果對我傷害太大了,剛才就哭得有些缺氧。現場觀眾雖然大部份來自英國,但所有人都安慰我,我覺得每個人內心都是公平的。」而中國團隊賽後表示,今次發生嘅事令人難以置信,認為係一大醜聞,必定向有關方面投訴。
至於禾頓就表示,自己係以另類方法爭勝,對手被取消資格而落敗,並唔係自己嘅錯:「所有人都可以有自己意見,但贏咗就係贏咗,我係3次世錦賽冠軍,所有人都唔可以改變呢個事實。未來我一樣會用相同方式爭勝。」利用條例灰色地帶攞分無可厚非,不過肉酸到玩相撲咁10次推人出界,禾頓似乎轉往日本參加女子相撲更易成名。
支持本地運動員,一齊去「睇體」!
東網體育FB同你追實體壇每個精彩時刻!
Follow東網體育IG一齊撐本地運動員!