磨劍10年 石偉雄奪跳馬世界盃冠軍
20190527
東網電視
更多新聞短片
(石偉雄FB)
香港「跳馬王子」繼去年衞冕亞運體操跳馬金牌後，如今再下一城登上世界盃冠軍寶座！周一(27日)凌晨在克羅地亞奧斯積克舉行嘅體操世界盃Dobro World Cup Osijek 2019，石仔以14.734分，力壓意大利及以色列選手，贏得跳馬金牌，為港爭光。
石仔今次以新動作「李世光跳」（笠松轉體270度後空翻兩周）完成賽事，初賽時發揮水準，以首名躋身決賽。決賽首跳落地稍微失誤，取得14.667分，第二跳佢立即調整，跳出14.8高分，終以14.734分力壓意大利選手仙高蘭尼（Andrea Cingolani）封王，應屆歐錦賽跳馬亞軍、以色列選手麥菲德夫（Andrey Medvedev）以14.284分位列第三。 。
呢塊金牌佢已經等咗10年，今次除咗動作升級，自己嘅頭銜亦可以升級，奪冠後石偉雄喺自己社交專頁分享喜悅：
「由2009年開始一直比世界杯，每次都同獎牌無緣，每次都係45678，次次都差少少，今次終於可以拎到世界杯冠軍，呢一塊獎牌我等左10年，今年終於可以拎到啦，第一次用新動作，好大壓力，最終都可以順利完成，雖然做到新動作，但仲有好多既瑕疵，黎緊會繼續努力改善，希望下次會做好D，除左動作既upgrade, Title都終於可以upgrade啦好多謝我既教練 @sergiy777 ，屋企人，裁判專業既意見，體院既治療師、體能教練、營養師，等等幫助我既每一位同事，同埋總教練同總會既配合」
石仔自舊年喺雅加達亞運會成功衞冕後，一直苦練新動作「笠松轉體270度後空翻兩周」，並提早喺今次克羅地亞站世界盃「亮劍」，為年底世錦賽爭取2020東京奧運資格作準備。佢稍後將征戰世界盃斯洛文尼亞站，再為港爭光。
支持本地運動齊去「睇體」！
東網體育FB同你追實體壇每個精彩時刻！
Follow東網體育IG一齊撐本地運動員！