【有片】超自然控波法！真人版‧少林足球

《彩報》豪裝，入市即贏！撳撳呢條Link，寶藏等你拎：http://win.on.cc/football/　

細細個睇足球小將，已經覺得倒掛金勾好犀利，個人跳到「老連」咁高，成個人倒轉咁射波，點會唔覺得不可思議？到大咗睇得波多，發覺唔少球員都入過呢類波，而且亦見有後衞用呢招解圍，睇慣咗先冇大驚小怪。但講到成個彈起、好似倒掛咁凌空伸腳去控波，你又見過未？呢位巴西小將柏度域陀就做畀你睇，真係好似睇緊真人版少林足球一樣！

今年21歲嘅柏度域陀，依家效力烏克蘭超級聯賽球隊利沃夫，剛啱於附加賽鬥亞歷山德里亞，佢就表演呢個能人所不能嘅技術，當時佢於剛過半場嘅左邊邊線，接應隊友後場大腳傳送，因為個波傳得比較高，一般球員會跳起搵頭或者心口控個波落嚟，但柏度域陀就索性嚟個倒掛動作、伸盡隻左腳控個波，呢次嘗試非常成功，佢不單控到個波，仲踢到個波去前面、即刻壓上沿邊線出波，成個動作一氣呵成，呢個後生仔有前途呀。