全球最有愛擁躉　利迷又益佢做最佳球員！

好多經典球星、頂級勁旅，都話利物浦好難對付，原因係佢哋嘅球迷勁忠心，每次去到晏菲路都被震耳欲聾嘅歌聲嚇到腳軟，就知利迷唔講得笑。利迷唔單只支持現時球員，更力撐以往效力嘅忠臣，盧卡斯利華就係一個例子。

呢名巴西中場17年轉投拉素，結束紅軍10年生涯，雖然喺中立球迷眼中，盧卡斯利華算唔上係咩頂級球星，不過利迷就係欣賞佢多年來忠心耿耿，就算盧卡斯利華已經離隊，一樣留意住佢一舉一動。

上年拉素選年度最佳球員，雖然盧卡斯利華表現唔算突出，但於利迷瘋狂投票下，就以71%得票贏隊友九條街當選；到選18/19年最佳球員，盧卡斯利華依家已有88%得票，其他2名候選人僅得票6%，幾可肯定連續2年以壓倒性姿態當選，一樣都係多得利迷發功。