馬圖斯爆料：占士下季踢呢隊！

哥倫比亞中場球星占士洛迪古斯，近2年星運平平，今夏拜仁已決定唔作正式收購，佢只能死死哋氣返皇馬，但眾所周知施丹對佢毫無興趣，占士唯一出路就係離隊。早前有傳出阿仙奴有意收留佢，但原來占士仲有知音人，德國名宿馬圖斯就大爆，C朗想同佢故劍重逢。

占士效力皇馬期間，同C朗拍檔贏得2次歐聯、1次西甲錦標，馬圖斯話同過占士傾偈：「早前拜仁贏完德甲冠軍後，我同占士傾過。佢同我講原來一直有同C朗聯絡，佢話C朗好想再次合作，所以我相信祖雲達斯會收購占士。」