貴過VVD!曼聯壓曼城購三獅第一中堅

2019年06月15日 07:00
東網電視
更多新聞短片
(互聯網)

「美洲國家盃」全天候至強盤路資訊,一網睇晒:
https://bit.ly/2wOTjaV 

曼聯上季動亂不安,辭退摩連奴後引入蘇斯克查,蘇帥戰績就如過山車一樣,曾經打出超水準瘋狂搶分,但到最後階段不單被巴塞隆拿擯出歐聯,於英超最後2仗鬥降班隊竟只能攞得1分,僅能以第6名過終點。蘇帥今夏誓為曼聯換血,繼購入「新傑斯」丹尼爾占士後,亦勢以天價購入英格蘭國腳中堅哈利馬古尼,隨時令呢位李斯特城主力,取代華基爾雲迪積克成全球最高身價後衞!

「曼市雙雄」曼聯同曼城,今夏都有意欲購入後防球員,前者自摩連奴時代起,都未有夠卡士嘅鐵衞領導後防,後者上季尾則有隊長高柏尼離隊,另外亦盛傳奧達文迪都會轉會他投,《鏡報》就報道兩支曼市勁旅,都睇中26歲嘅哈利馬古尼。

呢名俄羅斯世界盃殿軍主力成員,上季已有風傳出曼聯對佢有興趣,今季遇着同市死敵搶人,《鏡報》指哈利馬古尼屬意轉投曼城,不過藍月亮認為佢只值5000萬鎊,同李斯特城標價嘅8000萬鎊相去甚遠,狐狸絕對唔會低價放走呢名重心球員。曼城無意提高報價下益咗曼聯,曼聯求財若渴,極可能以超過7500萬鎊求購良才。

曼聯方面好有信心,當李斯特城接受報價後,就可說服哈利馬古尼答應加盟。加利尼維利早前認為,好多人覺得全英用波最佳後衞係史東斯,但佢認為哈利馬古尼同佢不相伯仲,而佢亦擁有成為頂級中堅嘅一切條件。若曼聯成功購得心頭好,呢名擁有20頂喼帽、身高1米94嘅中堅,好大機會壓倒VVD(身價7500萬鎊)成全球最高身價後衞,並成為紅魔未來數年嘅後防大佬。