上季戰績令人失望嘅曼聯周一(1日)集合全體球員展開新一季操練，領隊蘇斯克查早上6點半就返到卡靈頓訓練基地準備，各球員駕駛名車陸續現身，但就唔見咗扭計離隊嘅法國中場保羅普巴，佢同蘇斯克查申請咗遲返，然後獨自在紐約紅牛球場操練，咁都得？

曼聯季前集訓行程緊密，蘇斯克查制定一系列訓練，開季每日兩課晨操午練，之後就會展開漫長嘅環球集訓，包括去澳洲、中國、新加坡及威爾斯，對球員嚟講體能負荷相當大。

盧卡古幾乎肯定離隊，轉會國際米蘭，其實佢大可以唔出席，但佢都好有專業精神，一日有糧出，一日仲係紅魔鬼，佢都唔呃鐘照出現，揮灑汗水操弗自己，呢啲真係好球員。

至於曾話過曼聯唔放人就罷操罷賽嘅保羅普巴，喺開操日真係唔嚟，留喺美國獨自操練，雖然畀晒相大家睇佢真係有練波，但曼聯係一支球隊，如果個個學佢咁獨自操練，咁唔使集訓啦。