蘇斯克查魔鬼訓練！教練操到虛脫入廠

正喺澳洲進行季前集訓嘅曼聯，周六(13號)傳出教練被緊急送院消息，澳洲傳媒最初話被送院嘅曼聯職員係因為「服藥過量」，不過英國《太陽報》已經證實，被送院嘅係蘇斯克查助手馬克丹普西，呢位55歲教練嘅老婆話佢因為頂唔順艱苦訓練環境而「跪低」，幸好依家情況良好。

喺80年代曾經短暫效力曼聯嘅馬克丹普西，退休後曾經教過曼聯青年軍，上年隨蘇斯克查重返「紅魔鬼」，佢前日喺曼聯下榻嘅5星級酒店內報稱不適，要由救護車緊急送院，報道指佢經過治理後已經冇乜大礙，但仍要留院觀察。

雖然有傳佢入院原因係「服藥過量」，不過馬克丹普西老婆Susan就表示，馬克丹普西嚟到澳洲之後，因為訓練密度太強同埋時差問題，連日嚟都失眠，結果搞到虛脫而喺酒店內暈低，由於馬克丹普西脫水需要吊鹽水，所以暫時唔可以出院住，估計冇乜大問題。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。