【有片】貝碧托夫鬼影控球 搞囡囡後面

2019年07月13日 17:01
東網電視
更多新聞短片
(互聯網/Getty Images)

前曼聯射手貝碧托夫雖然已經掛靴,但技術並冇生疏,佢近日一時技痕,喺屋企玩控球,表演一下突發式「控波救人」。

當時呢位保加利亞名宿「的的」下波,而囡囡就坐定定,背住佢玩泥膠。貝碧托夫其中一下可能用力過度,搞到甩腳,皮球笠過自己,眼見就快省中囡囡後腦,佢回身使出一招大鵬展翅,高難度控球,成功化險為夷,而囡囡完全感覺唔到自己幾乎食波餅,可見貝碧托夫控球技術達到「鬼影靜音」境界。

貝碧托夫似乎都好滿意自己今次「拯救」咗囡囡,將影片放上社交網,話為咗女兒,可以發揮出小宇宙。

不過,呢一幕又咁啱會拍到片,令人懷疑佢早有預謀,想證明自己寶刀未老,但囡囡慘成「實驗品」。

38歲嘅貝碧托夫球員時代,曾被嘲諷為「Hea碧」,皆因佢速度比較慢,跑動範圍比較細,但勝在個人技術出眾,踢法非常瀟灑,一兩下細膩動作,可以玩到對方守將陀陀擰。

貝碧托夫今次喺企屋淺窄空間之中,做出高難度控球,再次突顯佢大師級架功,難怪曼聯球迷叫紅魔鬼管理層邀請貝碧托夫加入教練團,教下盧卡古點樣控波。

立即參加「賞您睇」:http://bit.ly/2JWKULh 
Click下面粒掣,儲on.cc coins!機票、家電、超市禮券、過萬份獎品等緊你。