「嘉諾Sir」同大家見證王者誕生

2019年07月13日 22:00
東網電視
更多新聞短片
「賽馬會青少年聯賽足總盃」U15、U16及U18決賽,周日(14日)上演。

毋需登入,立即睇直播:
https://tv.on.cc/newslive/ 

本年度「賽馬會青少年聯賽足總盃」U15、U16及U18決賽,周日(14日)早上11時開始一連3場假蒲崗村道公園人造草1號場舉行,賽事不設門票,歡迎各界人士到場為香港足球之「未來」打氣。未能入場之球迷,則可透過on.cc東網或facebook專頁《我撐本地波》觀看直播。現在就由屆時擔任嘉賓評述的「嘉諾Sir」郭嘉諾,為大家分析一下3場大戰啦!

【U15決賽●傑志Vs九龍城】

各位球迷朋友,大家好,我係郭嘉諾。U15嘅球員,即係2004年出世,香港呢個年齡層表現最突出嘅球員,基本上喺晒傑志、九龍城同香港飛馬3隊波度,好多都有入選香港U15,而我對佢哋係非常熟悉,因為佢哋由當初港隊選拔,到訓練同出賽,都係我一手一腳負責嘅,前前後後都差唔多3年咁耐。

先講傑志,佢哋好多球員都有踢香港隊,特別喺防守位置上,主力之一嘅香港隊雙隊長張譽倫,佢爸爸係台灣人,好支持佢踢波,喺後防演出好有大將之風,喺傑志拍住嚴啟倬,守得好穩陣,呢點正正喺傑志攞「賽馬會青少年聯賽(U15-甲組聯賽)」冠軍,全季只失8球反映出嚟。除咗後防,佢哋中場都有一位好出色嘅球員,就係Sogho!呢位港日混血兒中文名叫趙聡悟,腳法好好,4強戰佢都入咗1球,幫傑志2比0淘汰香港飛馬。

好多人見到九龍城今季嘅戰績,都會覺得好驚訝,點解一支區隊可以大爆發,勇奪聯賽季軍後,喺足總盃晉級路上仲場場大炒。其實,九龍城嘅教練高俊喺1年前入主,之前好多喺其他球隊跟過「高Sir」嘅球員都跟番佢,當中不乏好好嘅球員,仲要係香港隊主力,好似中場球員何瀧浩腳法細膩,係香港隊雙隊長之一,將來必成大器!另外李梓軒速度高,入球能力亦強,另外「10號仔」曾昭灝喺中、前場往往產生到好大威脅。

總括而言,今場波大家可以睇到全港大部分表現超班嘅U15球員,兩隊喺聯賽都入到過百球,但同時防守力亦都好強,呢場強強對碰一定會好好睇,我非常期待!(開賽時間:上午11時)

【U16決賽●元朗Vs南華】

呢場有我帶咗一年嘅元朗,喺「賽馬會青少年聯賽(U16-甲組聯賽)」攞第4嘅元朗,雖然陣中未有球員入選香港隊,但佢哋由16強開始,演出一路都畀到人驚喜。整體表現咁出色,一大關鍵係教練龍震宇,多年嚟一直好畀心機去帶隊,由U12開始一直帶到依家,全隊夾關夾熟。隊長林穎峰,同中場羅天朗都值得大家留意佢嘅表現。

「賽馬會青少年聯賽(U16-甲組聯賽)」排名高元朗1位攞季軍嘅南華,陣中都有唔少香港隊球員,好似佢哋門將顏翱天,同時亦係男拔門將嘅佢,身手了得,特別係喺撲救12碼方面,幾有心得。

今場到底係擅長踢整體戰嘅元朗贏?定陣中有唔少技術型球員嘅南華可以封王?我都好想知,大家到時記得捧場啦!(開賽時間:下午1時30分)

【U18決賽●南區Vs傑志】

若果睇2001年出世嘅球員,最好嘅都係踢車路士足球學校(香港)、太陽飛馬,同埋南區,而傑志就有好多出色嘅「02年球員」,咁多年嚟幾隊都係爭崩頭。後來太陽飛馬退出咗,啲球員都去晒其他隊,好似于楊就先後效力南區同傑志,而陳晉一更加為傑志喺亞冠盃外圍賽上過陣。

先講講上屆冠軍南區,喺港超南區係一支好多球迷支持嘅區隊,佢哋嘅青訓梯隊成績亦非常好,好似U18咁就貫徹到港超隊穩健嘅比賽風格,教練呂文輝同「大佬」沈國輝帶得好成功,佢哋出眾嘅防守係喺聯賽登頂嘅最大本錢。球員方面,大家可以留意已經上咗一隊嘅鄭進泓,同埋伍啟睿,佢兩個發揮成點,係南區可唔可以成為「雙冠王」嘅關鍵。

上季屈居亞軍的傑志,今季捲土重來,陣中除咗好多球迷都認識嘅陳晉一同于楊之外,大家不妨多啲留意吓,司職翼鋒嘅唐曉峰嘅演出,佢有腳法、有速度,係香港少有嘅球員類型。仲有一位張廣然,佢之前喺對曼聯青年軍嘅比賽都入過波,好有膽識。

呢場絕對係青年軍級賽事嘅大戰,兩邊都唔係「o靚仔波」,期待合演一場好波畀廣大迷欣賞。(開賽時間:下午4時)


【7‧14「青少年聯賽(足總盃)」決賽日】

地點:蒲崗村道公園人造草1號場
上午11時●U15決賽:傑志Vs九龍城
下午1時30分●U16決賽:元朗Vs南華
下午4時●U18決賽:南區Vs傑志

毋需登入,立即睇直播:
https://tv.on.cc/newslive/