【有片】中超恐怖飛腳踩心口 睇見都痛

2019年07月14日 10:06
東網電視
更多新聞短片
(互聯網)

2010年世界盃決賽,荷蘭中場尼祖迪莊一記穿心腿踢落沙比阿朗素身上,唔少球迷都記憶猶新,估唔到嚟到2019年,中超都成功複製呢個恐怖經典!話說尋晚中超有場江蘇蘇寧主場對上海上港,開波僅僅7分鐘,蘇寧球員葉重秋喺一次搶波竟然凌空施展一腳穿心腿,踢落上港球員楊世元心口,場面超恐怖。

楊世元事後當然即刻倒地不起,要接受治療,跟住就發現仍眼角被踢穿,波衫又畀對方波砵鞋釘踢爛,就連肋骨都有明顯傷瘀痕,認真離譜。球證之後將葉重秋以直紅趕出場,楊世元都因傷被換走,最後場波由上港大勝3比0。

賽後上港新聞官講番楊世元接受治療過程,話佢慘叫聲勁得人驚:「令人矚目驚心嘅外傷,球衣都被踩爛一大塊。換走之後,喺更衣室當隊醫用火酒為傷口消毒嗰陣,個慘叫聲勁恐怖。」

至於行兇嘅葉重秋,賽後都知衰,喺網上公開道歉:「喺呢度我真誠向楊世元致歉,對唔住。我為呢個動作感到愧疚,對球員嚟講,呢個係一個傷害性動作,係最唔應該出現嘅。我已經深刻反省自己,無論球隊作出任何決定,我都尊重!再次向楊世元道歉,對唔住!」起碼都知衰,不過對手受傷就補唔番囉!

立即參加「賞您睇」:http://bit.ly/2JWKULh 
Click下面粒掣,儲on.cc coins!機票、家電、超市禮券、過萬份獎品等緊你。