尼馬又出賤招 一句說話羞辱PSG

2019年07月14日 11:44
東網電視
更多新聞短片
(法新社/Getty Images)

巴西球星尼馬想返巴塞隆拿,根本係個公開秘密,衰在巴塞畀錢一直未到價,加埋佢所屬嘅巴黎聖日耳門(PSG)又唔多想放人,搞到尼馬家陣喺PSG情況都幾尷尬。為咗逼令PSG放人,尋日呢位27歲球星喺巴西出席一場五人賽之後,受訪時講起佢球員生涯最特別時刻,佢竟然答話幫巴塞炒起PSG 6比1喎,咁唔畀面老闆嘅說話都講得出,似乎預咗同PSG反面喎!

尼馬為咗離隊返巴塞,真係無所不用其極,今次佢受訪就答話:「最特別係幫巴西贏得奧運冠軍,之後就梗係當我哋(巴塞隆拿)對PSG射入第6球嗰陣,我有一種前所未有感覺。」之後再被問到喺更衣室最佳時刻,尼馬又重覆多次:「當我喺巴塞淘汰PSG嗰陣,真係太特別,我哋成個更室都癲晒,我哋太開心喇,我認為嗰個就係我哋所有人有過嘅最佳感受。」

另一方面,尼馬仲喺個人IG發放一段視頻,段片最抵死係佢着住件巴塞波衫,展示出個巴塞會徽,然後仲講咗句:「任何針對你嘅攻擊都唔會成功。」有西班牙傳媒就認為,段片畀人感覺係佢認為冇人阻到佢重返巴塞囉!


立即參加「賞您睇」:http://bit.ly/2JWKULh 
Click下面粒掣,儲on.cc coins!機票、家電、超市禮券、過萬份獎品等緊你。