史達寧宴客孭鑊　曼城嚟香港補飛

今晚喺上海舉行嘅英超亞洲挑戰盃決賽，曼城喺法定時間先有史達寧宴客，去到互射12碼階段，更畀狼隊門神魯爾柏迪斯奧勇救3球極刑，最終輸2比3，未能搶頭彩認真失威。

首仗大勝韋斯咸4個一皮嘅曼城，嗰場後備入替省兩粒嘅史達寧，今仗拍住奇雲迪布尼、利萊辛尼擔正，面對上季對Big 6頂得兩嘴嘅狼隊，21分鐘辛尼快速殺入禁區被撞跌，球證直指12碼，可惜史達寧操刀炒飛機，錯失領先良機真嘥料，見到主帥哥迪奧拿喺後備席淡淡定飲水，好似預咗史達寧會宴客。下半場雙方仍未能打破僵局，惟有以互射12碼分勝負，狼隊門神魯爾柏迪斯奧如有神助，先後救出根度簡、大衞施華及尼美查嘅極刑，最終曼城爆冷輸2比3，未能繼2013年後再捧英挑盃。

至於頭場紐卡素憑日本前鋒武藤嘉紀於上半場一箭定江山，以1比0擊敗「錘仔幫」韋斯咸，對啱啱接手嘅新帥布魯士而言，算係有個好開始。

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。