褫奪轉會話事權　普捷天奴發火狂寸熱刺

熱刺今個暑假轉會行動未見活躍，雖然重金簽入法國中場尼當比利，不過之後傳聞買保羅戴拿、賴恩施斯隆、波基斯費南迪斯、盧施素等全部冇晒下文，搶丹尼施巴路斯同韋利安沙列巴又輸畀阿仙奴，領隊普捷天奴周三(31號)熱身賽贏皇家馬德里後，亦忍唔住向熱刺瘋狂發炮！

普捷天奴賽後被問到轉會問題，即刻「着燈」狂開火：「我唔係(轉會)負責人，我對球員嘅情況一無所知，我只係負責教波。轉會可能會或者可能唔會出現，球員買賣、球員續唔續約，全部都唔係我控制，係球會同利維(熱刺主席)控制。」

熱刺官網將普捷天奴職位列為領隊(Manager)，但呢位阿根廷名帥就發晒脾氣叫球會幫佢「改名」：「或者熱刺要將我個職位改一改名，因為我嘅職務只係教練(Coach)，我只係負責搞練波、比賽、戰術等，球員嘅情況唔到我理。」

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。