【有片】死線日食白果　曼聯迷怒火爆發！

英超轉會窗死線日完結，各路雄師都積極加強兵力，不過曼聯喺呢一日就「食白果」，之前一直盛傳即將加盟嘅波基斯費南迪斯、基斯甸艾歷臣同保羅戴巴拿，冇一個可以搞得掂，就連祖雲達斯老將中鋒文迪蘇傑都簽唔到，唯一一單交易就係放走盧卡古，球迷失望都可以理解。

有曼聯球迷就嬲到失控，火燒上季曼聯作客粉紅色波衫洩忿，而且將成個過程拍埋片放上網，同其他曼迷分享佢嘅「憤怒」，矛頭直指行政總裁伍德沃德：「我已經心碎，我最愛嘅曼聯成為一個笑話，全因伍德沃德呢條友！我會以中立身份去睇新球季，我冇能力再承受多次上季嘅慘痛。」

不過講句公道話，曼聯今個夏天買哈利馬古尼、雲比沙卡同丹尼爾占士，合共都使咗1億5,000萬鎊，使嘅錢係英超入面最多嗰隊，球迷又好難話曼聯高層同伍德沃德唔支持球會喎！

立即參加「賞您睇」：http://bit.ly/2JWKULh　

Click下面粒掣，儲on.cc coins！機票、家電、超市禮券、過萬份獎品等緊你。