超陰功!科特迪瓦國腳印度搵食墮軌身亡

2019年08月14日 17:30
東網電視
更多新聞短片
(互聯網)

真係搵食艱難,難到要客死異鄉呀!曾效力英冠球會查爾頓嘅科特迪瓦國腳阿保巴卡迪奧文迪,上周五被發現喺印度一班火車跌落路軌慘被輾斃,屍身不全,認真陰功呀!

31歲嘅阿保巴卡迪奧文迪,司職中場,2006年曾經去過查爾頓效力,不過唔夠一季就被外借去比利時聯賽,之後更返番祖家落班至今。直到今年夏天,早前曾以隊長身份代表科特迪瓦出戰非洲足球錦標賽嘅佢,同所屬球會約滿回復自由身,早前佢同就搵到間印度球會落班,直到上周四佢坐飛機去到孟買,之後再轉火車去加爾各答,準備向新球會報到,可惜去到上周五8月9日,印度警方喺火車軌上發現迪奧文迪屍體,當時屍身已經殘缺不堪,警方最後憑住喺屍身附近發現嘅手提電話,證明到迪奧文迪嘅身份。

印度警方事後表示,經初步調查後,相信迪奧文迪係由火車跌落路軌後身亡:「目前仲未知佢坐邊部火車。我哋已經聯絡咗佢喺德里嘅朋友,並將迪奧文迪死訊通知咗佢家人。」據知,暫時仲未有人去認屍。

查實印度火車一向出名超載嚴重,甚至有人會坐上車頂,或者扶住車卡窗戶企足全程。至於今次迪奧文迪身亡係咪同超載有關,就仲未知。