唔畀佢白逗人工！曼聯後防勢脫魔

曼聯今夏買入3名球員，其中哈利馬古尼同雲比沙卡係後衞，屬球隊必然正選，再加上球隊後防大把人腳，阿根廷國腳馬高斯盧祖要出場難過登天。於英格蘭轉會窗關閉前，盧祖未能過檔愛華頓，但曼聯未有放棄要踢走佢，盧祖好有機會喺短期內，被借到土耳其費倫巴治。

幾乎可踢後防任何位置嘅盧祖，今季肯定爭唔贏域陀連迪路夫，同馬古尼夾檔中路；勞基梳爾同雲比沙卡就係左、右閘正選，盧祖要突破上季上陣6次嘅數據都有難度。早前愛華頓希望借得盧祖，但雙方未能達成協議交易拉倒，但曼聯唔想佢喺陣中白逗人工，所以積極向全球兜售呢名後衞。據《太陽報》報道，費倫巴治已同曼聯接觸，雙方已開始傾緊借用細節，預料交易好快水到渠成。