皇馬唔對辦施丹亂晒籠 新兵慘爆勢被外借

2019年08月14日 22:00
東網電視
更多新聞短片
(互聯網)

皇馬今季斥巨資超過2億鎊,購入夏薩特等多名新血,希望於新季復仇巴塞,並再於歐聯大展拳腳。但銀河艦隊於季前熱身賽表現麻麻,不單夏薩特超重又Hea踢,其他新兵又唔算標青,當中包括身價達6200萬鎊嘅盧卡祖域。塞爾維亞傳媒報道,皇馬覺得盧卡祖域貨不對辦有意將佢借走,如果屬實對呢位年輕前鋒嚟講肯定非常難受。

盧卡祖域上季喺法蘭克福踢到曉飛,於各項賽事上陣48次射入27球,當中包括10個歐霸盃入波,今夏成為皇馬獵物,為銀河艦隊本季首個收購。但佢於國冠盃等熱身賽唔多見影,仲於3:7大敗予馬體會一仗受傷。

《馬卡報》轉載塞爾維亞傳媒報道,施丹對盧卡祖域相當唔滿意,開始懷疑呢名塞爾維亞21歲國腳,究竟夠唔夠班踢皇馬,故有意於佢加盟2個月後將佢借走。皇馬今夏錢又使咗,但實力似乎冇大增,可能會孤注一擲,斥巨資加球員簽入尼馬救亡,如果尼馬真係加盟,盧卡祖域被外借都唔奇。