剷到A山飛起炒大鑊　曼聯新仔堅唔畀面

曼聯雞肋阿歷斯山齊士，自18年1月成魔後，年半後已輕鬆袋足4100萬鎊，但貢獻堅係少之又少，難怪曼聯勁想將佢革扯，正想貼錢借佢到羅馬。A山已成高薪低能嘅代表人物，於球隊內地位勁低，據《太陽報》報道，早前佢踢完美洲國家盃歸隊後復操，畀格連活特怒剷成份炒起，之後雙方發生激烈口角，似乎連新仔都唔妥佢。

A山於美洲國家盃發揮唔曳，智利亦成功殺入4強，不過佢一返到曼聯就似乎唔識踢波，早已傳出佢於紅魔冇乜朋友，於網上亦只與盧卡古互動，依家連呢位比利時前鋒都已離隊，A山更加孤立無援。

一直身有微傷嘅A山，非常保護自己身體，不過於操練中格連活特就吓吓去盡，早前A山就曾畀呢名17歲前鋒成份炒起，A山當然嬲到震開口勁鬧，但格連活特冇赦佢駁番轉頭，搞到場面極不愉快。