沙拿公開寸哥迪奧拿　你撐邊個？

利物浦即將於伊斯坦布爾，同車路士爭歐超盃，王牌前鋒穆罕默德沙拿賽前表示，歐聯先係球壇最大榮譽，並唔係英超冠軍。曼城上屆歐聯8強出局、但以1分力壓紅軍成功衞冕英超寶座，領隊哥迪奧拿話贏英超比贏歐聯更難，所以榮譽比歐聯更大；沙拿就直截了當反駁，話如果畀哥帥選擇，會寧願捧歐聯冠軍。

沙拿表示：「老實我冇聽過佢咁講，但如果畀佢揀，都會揀攞歐聯冠軍。呢個係我意見，唔代表佢嘅，不過歐聯的確係球壇最高榮譽，每個領隊、球員都夢想奪得呢個獎盃。雖然英超冠軍都好重要，但一定比唔上歐聯。」

哥迪奧拿對上1次贏歐聯冠軍，係2011年為巴塞奪得，之後佢教拜仁同曼城都做唔到歐洲王者；佢麾下嘅「藍月亮」，頂多只能入到歐聯8強。