係愛呀！馬古尼推咗曼城肥約去曼聯

曼聯新兵中堅哈利馬古尼首場聯賽就用出色表現贏得各界讚賞，能夠有好演出，除咗話佢本身好波之外，其實極有可能係因為佢對「紅魔鬼」充滿「愛」呀！事關根據《每日郵報》所講，呢位前李斯特城球星係推咗一份曼城肥約，而選擇投效曼聯，家陣佢份人工，相比起曼城開嗰份約，係少咗接近9萬鎊周薪，你都咪話唔大犧牲呀！

根據報道，曼城係開出咗一份周薪高達27.8萬鎊嘅合約畀馬古尼，不過最終一來曼城嫌佢轉會費太貴，二來係馬古尼本身都選擇去曼聯，所以佢最終同「紅魔鬼」簽咗份19萬鎊周薪合約。另外，有傳馬古尼加盟曼聯只係兩周，但佢嘅領導能力同感染力，已經贏得隊友認同，當正佢大哥一樣，希望馬古尼嚟緊真係會愈踢愈好啦！

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。