巴洛迪利投法林明高失敗 竟然因為咁?

2019年08月16日 13:19
東網電視
更多新聞短片
(互聯網)

巴甲法林明高今日發聲明宣布,引進意大利球星巴洛迪利一事已經告吹,而同時間,「巴神」都證實談判失敗,依家唯有暫時繼續失業。

法林明高份聲明話:「球會同巴洛迪利及佢經理人喺摩納哥進行咗2日會面商討,最終決定唔再考慮簽佢。」自從上季尾離開馬賽之後,「巴神」至今一直未有落班,之前有傳法林明高好快會簽佢,仲開出咗一份年薪300萬歐元嘅兩年合約。可惜,根據《環球體育》報道,「巴神」竟然要求法林明高簽埋佢細佬恩歷克,畀佢踢法林明高二隊,事關「巴神」覺得離鄉別井搵食,最後有家人陪喎!

睇番呢個恩歷克巴洛迪利,今年26歲,都係踢前鋒,曾經跟住「巴神」去曼城試腳,當然過唔到啦!之後恩歷克就喺意大利同馬爾他嘅低組別聯賽搵食,有幾多料,大家心知肚明,你估真係買菜搭棵蔥咩?

立即參加「賞您睇」: https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。