【東體爭議】華拿:中超15年內追平歐洲水平

2019年08月16日 17:15
東網電視
更多新聞短片
(互聯網/Getty Images)

近年愈來愈多正值當打之年嘅歐洲頂級聯賽球員,去中超搵食,包括之前效力拜仁慕尼黑嘅德國前鋒辛度華拿。

呢位31歲前鋒今年1月由拜仁加盟中超球隊天津泰達,佢近日接受德國媒體《轉會市場》訪問時,話中超水平遠比想像中高,更預言只需要15年時間,中超就可以達到歐聯主流聯賽水平。

辛度華拿話:「中超有好多出色球員,例如卡拉斯高、荷西保連奴、咸錫、奧古士圖、馬斯真蘭奴、拿維斯等,中國足球同德國足球最大區別係比賽節奏,整體水平仍然同歐洲有距離,但已經比我之前想像中高好多。」

曾經以天價人工效力上海申花嘅前阿根廷國腳泰維斯講過,中國足球50年之內都冇競爭力,但辛度華拿就唔同意:「如果中國採取正確青訓方法,應該可以喺10至15年內達到歐洲水平,好多中國球員都擁有良好身體質素,只係欠缺基本訓練內容,佢哋目前行緊嘅方向都算正確,應該會愈來愈好。」

對於泰維斯自稱喺中超7個月生涯似度假,辛度華拿否認自己來中超養老:「講真你喺呢度生活、工作,賺好多錢,就應該尊重中國,如果泰維斯當年只係來度假,咁應該係佢嘅職業態度有問題。」

辛度華拿今季中超已經射入6球,天津泰達教練係德國人史泰歷克,有助佢迅速適應新環境。

立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。