黑仔老烏又孭鑊 車仔臨尾香多得佢唔少

20190901
東網電視
更多新聞短片
(Getty Images)
曼聯冇章法冇戰術,車路士都唔好得去邊。車仔主場迎戰升班球隊錫菲聯,半場已經憑譚美阿巴謙梅開二度領先2球,但球隊又係換邊後崩潰,完場前正選中堅葛特蘇馬又孭鑊,門前解圍抽咗個波入網,最終車仔被迫和2:2慘失2分。
車路士上仗終於打開勝利之門,對住另一支升班球隊諾域治2次被扳平,最後險勝3:2,顯示後防非常不穩。其實計番前2場聯賽,車仔已經失咗5球,如果計埋今仗又失2球,4戰共失9球。
面對實力一般嘅錫菲聯,車仔憑主場之利再藉對手門將甩手,阿巴謙早早先開紀錄。完半場前呢名英格蘭新銳再入1球,帶住2球優勢入更衣室。但車仔後防始終騰騰震,換邊後哥林羅賓遜接應左路傳送近門射入追番粒,之後車仔之能同錫菲聯駁槌,並冇特別優勢。去到完場前蘇馬被對手力壓下撻咗個波入網,林柏特又眼白白睇住班波失2分。蘇馬今季被林伯委以重任打正選,但首仗對曼聯已輸12碼,呢場又擺個老烏,堅係濕滯。