安達靴里拉假波案上庭受審 涉嫌處理賄款

20190904
東網電視
更多新聞短片
今個夏天約滿離開曼聯嘅西班牙國腳安達靴里拉,加盟巴黎聖日耳門後波都未踢過,日前就返去西班牙接受假波審訊,連佢在內一共42名被告涉嫌喺2011年,喺西甲煞科護級大戰入面「操控賽果」,檢察官更要求判所有被告監禁2年、禁止參與足球活動6年!
西甲近年最大單假波案周三(4號)開審,安達靴里拉同前曼城前鋒卡些度一齊步入法庭,佢哋同前日本國家隊主帥艾古爾等42名被告,被指喺2011年西甲煞科戰、薩拉戈薩對利雲特一仗操控賽果,令薩拉戈薩贏波兼成功護級,安達靴里拉當時就係薩拉戈薩其中一位球員。
巴倫西亞地方法院上年宣布重審呢單假波案,事關檢控官掌握到新證據,佢哋發現薩拉戈薩對利雲特嘅比賽前幾日,兩隊球員、教練有多項唔尋常嘅電子轉帳紀錄,懷疑透過分散過數方式將965,000歐元轉畀利雲特球員作為「輸波報酬」。據西班牙反貪污部門資料顯示,安達靴里拉曾經處理過2筆合共9萬歐元嘅款項。安達靴里拉事後曾發聲明,堅稱自己冇做過違法行為。
由於案情嚴重兼且涉案人物眾多,今次審訊預計會審到9月30號,安達靴里拉等被告要隨時準備上庭,嚴重影響現役球員嘅比賽賽程,有曼聯球迷表示「紅魔鬼」依家已經問題多多,避免安達靴里拉嘅「不安因素」都係一件好事。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。