24歲「老將」黎厚希:我要破4年嘅入球荒

2019年09月12日 22:00
東網電視
更多新聞短片
「人面不知何處去,桃花依舊笑春風。」
去季效力夢想FC的中場黎厚希,今季以借用形式重投佳聯元朗,身為元朗青訓產品、家住天水圍的他形容心情就像「回家」一樣:「依家我都算係隊中主力之一,身為元朗人,踢元朗呢隊波會更加落力,希望感染到更多球迷,畀佢哋感受到我對地區嘅熱情!」
圖/文:陳焌鏗
「人面不知何處去,桃花依舊笑春風。」現時的佳聯元朗相比起兩季前的九巴元朗,不但名字有變,連人腳也截然不同。但有一個人,不論球會面對甚麼困境,仍選擇留在這裏,他就是精神領袖法比奧(Fabio)。「Uncle Fabio」得悉黎厚希加盟元朗亦大感興奮,「黎厚」說:「之前同法比奧合作過兩季,了解我踢法,佢都講笑咁講:『你返嚟就好喇,知道你係用波嘅球員,唔使擔心默契同溝通嘅問題。』」
從剛出道不久的黃毛小子蛻變成經驗戰將,24歲的「黎厚」笑言:「雖然我依家仲好後生,但感覺自己已經好老。」看見師弟陸續在頂級聯賽亮相,「黎厚」深感興奮之餘,也期望協助元朗隊友成長:「今季球隊比較多年輕球員,希望藉自己嘅經驗幫佢哋學多啲嘢。以前我19歲踢預備組、一隊嘅時候,佢哋仲係14歲,依家見到佢哋有能力喺港超立足,我都好開心同興奮!」
去年曾入選亞運港隊初選名單的「黎厚」,最終無緣遠征印尼,但他未有洩氣,期望日後能憑表現入選香港隊:「每個球員都會以香港隊為目標,我冇刻意去諗,我覺得如果你喺本地聯賽發揮到自己應有水平,香港隊教練會睇到,佢會根據球員表現揀出適當嘅人選,我都冇畀太大壓力自己,最緊要做好自己本分。」
要讓香港隊教練留下印象,爭取入球是其中一個方法,具備「遠程炮」能力的「黎厚」揚言,會嘗試在今季打破入球荒:「上次入波係2015年5月嘅事,嗰季入咗兩球之後就冇入過波,今季有機會嘅話,我都會試吓,不過有時入球都要靠少少運氣,盡力啦,希望入到靚波畀大家睇!」
●波衫冧巴88=警惕!
自2年前轉投夢想FC後,「黎厚」便一直身披88號球衣至今,這個號碼對他來說,正好是一個警惕:「呢個球圈好變幻莫測,正如夢想FC咁,未到最後一刻你唔知會點,好多嘢你努力過,但可能去到最後一刻你咩都冇。我要用呢個號碼去提醒自己,可能隨時都會畀人淘汰,因為88係『Bye Bye』嘅意思,前提係自己要盡最大努力,如果去到最後都得唔到你想要嘅結果,都對得住自己,呢個號碼可以警惕住我,唔可以喺呢個球圈懶散落去。」
【黎厚希檔案】
出生日期:1995年1月19日
身高:1米82
體重:79公斤
位置:中場、中堅
曾效力球隊:標準流浪、元朗、九巴元朗、夢想FC
現效力球隊:佳聯元朗
球衣號碼:88