高柏尼狂捧利物浦球星:英超史上最佳

2019年09月13日 00:05
東網電視
更多新聞短片
(互聯網)
剛舉行告別賽嘅曼城前隊長高柏尼,因為受傷關係自己未能出戰,可謂非常可惜。呢名曾4奪英超冠軍、4次英聯盃及2次英足盃嘅守將,絕對係英超史上其中一名最佳球員。被問到佢心目中邊個係英超史上最佳中堅,高柏尼嘅答案係華基爾雲迪積克。
英超史上優秀中堅極多,泰利、里奧費迪南、尼曼查維迪以至佢本人,都係唔少球迷心目中嘅最佳中堅人選,但高柏尼就力推VVD:「雖然佢唔係於英超踢咗好耐,而泰利、里奧費迪南等喺英超直頭係創造出一個時代,但VVD嘅成熟程度同實際表現,就好似佢已經係喺呢度,已經有長期優秀演出一樣。」
「同埋最關鍵係,我見唔到英超有其他中堅,可以喺佢加盟之後,所效力嘅球會有咁突飛猛進嘅表現、取得非常犀利嘅成績。所以我會揀VVD。」VVD於2018年1月加盟利物浦,之後上陣78次攻入8球,上季利物浦全季聯賽只失22球,比起之前2季失46同42球,防守力強咗一大截。上季利物浦同曼城鬥到最後一輪先失落英超錦標,但最後憑VVD完美表現,利物浦成功奪得歐聯冠軍。華基爾雲迪積克早前已奪得歐洲最佳球員,亦被睇好可以擸埋金球獎。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。