【東體爭議】伊度奧:莫連奴最啱教巴塞

2019年09月13日 11:01
東網電視
更多新聞短片
(Getty Images/互聯網)
「寸王」莫連奴自上年12月被曼聯炒魷之後,仍然未能取得教職,佢近日出席活動時,遇上昔日巴塞殿堂級射手伊度奧,以及西甲賽會主席特巴斯,獲得呢兩位重量級人物邀請,希望「寸王」重返西甲。
當時特巴斯表示,好想再次喺西甲見到莫連奴領軍比賽,伊度奧亦附和,更加大膽提出,莫帥應該去執教巴塞隆拿:「巴塞,你應該去巴塞。」仲話自己之前效力國際米蘭及車路士時,深深體會到所有球員都為莫連奴而戰。
事實上,莫連奴成名之前,就曾經喺巴塞擔任助教,輔助過卜比笠臣、尹戈爾,巴塞今季成績令人失望,3場聯賽只有1勝,現任教華爾維迪備受壓力,隨時有下台危機,莫連奴「回巢」巴塞並非冇可能。
不過,問題係莫連奴之前執教車路士、皇馬時期,曾經同巴塞有好多牙齒印,就算球會管理層想邀請佢領軍,恐怕巴塞球迷都未必接受佢。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。