阿仙奴長約綁實新韋拉　佢4歲已入廠

阿仙奴宣布同中場祖爾韋洛克續約至2023年，綁實呢位球員未來支柱人物，20歲嘅祖爾韋洛克4歲已經加入兵工廠足球學校受訓，今季正式升上一隊，最犀利係呢位新星首3場英超都正選上陣，可見領隊艾美利非常重視佢。

祖爾韋洛克早於2017年9月已經為阿仙奴出戰英聯盃對唐卡士打，至今為兵工廠一隊於各項賽事上陣20次，今季獲得擔正令人驚喜，並晉身英格蘭U21國家隊，可以話係阿仙奴今季最大發現。

領隊艾美利對祖爾韋洛克讚不絕口：「佢進步好大，技術出色，正選上陣都可以表現出應有承擔同信心，期待可以繼續同佢合作，睇佢展現天賦。」

根據德國《轉會市場》統計，祖爾韋洛克身價亦由540萬鎊，上升至900萬鎊，只要佢繼續保持水準，身價勢必水漲船高。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。