普基膺英超8月最佳　曼聯1月簽佢賠率急跌

諾域治今季升上英超後成績差勁，依家排喺尾2位置，不過陣中芬蘭射手迪姆普基就光芒四射，8月份4場英超交出5個入波同1次助攻，令佢擊敗史達寧、阿古路等巨星贏得每月最佳球員獎項，而8月最佳領隊就由利物浦主帥高普贏得。

迪姆普基喺英超平地一聲雷，自然會引嚟大球會垂青，最估唔到係博彩公司Coral，突然將迪姆普基1月轉會曼聯賠率升溫至3倍，發言人約翰希爾表示：「迪姆普基開季表現相當出色，如果佢Keep住呢種表現，轉去大球會係必然嘅事，曼聯目前係大熱。」

值得留意嘅係，迪姆普基依家已經29歲，曼聯新嘅轉會政策係盡量避免簽入已經過高峰期嘅球員，除非「紅魔鬼」喺明年1月面臨嚴重入球荒，否則迪姆普基呢類「短線投資」未必係曼聯心水。

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。