【有片】神奇!隱世高手角球直射梅開二度

2019年09月14日 13:01
東網電視
更多新聞短片
要喺開角球嗰陣直射入網,聽落難度極高,不過球迷都時有所聞,但如果一場波入面2次用角球直接入波,而且仲係9個月之內第4次咁樣射入,咁就絕對唔係「好運」咁簡單!英甲球會韋甘比嘅左閘祖積及臣,就堪稱係「地上最強」角球劊子手!
韋甘比上星期聯賽主場3比1擊敗林肯城,祖積及臣就上演帽子戲法,先係禁區外罰球入波,之後再2次開角球直入龍門,雖然其中一球入波前有省中人之嫌,不過英格蘭聯賽會檢視後,日前宣布入球歸於祖積及臣,令佢成功創造「角球入波梅開二度」呢個偉大事績。
唔講唔知,祖積及臣嘅「射角球」能力其實早已顯露,上季英乙聯賽對黑池同費列活特,都曾經上演過「角球直入」好戲,加埋今季呢2球,係祖積及臣9個月之內第4次角球入波,真係神乎奇技!祖積及臣對林肯城後亦自嘲表示:「我係有苦練角球射門,但平時踢得好差!而且我啲隊友會諗,我下下都角球直接射門,佢哋咁辛苦跑上嚟做乜?」
現年32歲嘅祖積及臣雖然只係踢英甲,過去亦只係效力布里斯托流浪、奧咸等小球會,但佢都曾經代表威爾斯U21上陣過14場,死球就係佢最強武器,對上兩季加埋入咗13球波,對一個後衞嚟講絕對係非常可觀嘅數字。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。