【東體爭議】超短龍門球成潮流 是禍是福?

20190917
東網電視
更多新聞短片
英超今季有唔少新規例,最受注目自然係VAR嘅引入,不過其中一條龍門球規例改變,竟然對英超球會戰術造成極大衝擊!以往龍門球要開出禁區外先至成立,但新例容許龍門球交畀禁區內嘅隊友(開出前對手唔可以入禁區),結果令多支球隊採用「超短龍門球」嘅戰術,但係效用係點就引發唔少爭議。
阿仙奴上場聯賽被屈福特逼和2比2,所失第1球就係超短龍門球被逼甩而「出事」,唔少球迷都批評呢種戰術係「捉蟲入Pat Pat」。不過,事實上英超大部份球隊都已經跟從呢個戰術潮流,據Opta數據顯示,除般尼、紐卡素、狼隊、錫菲聯、諾域治、屈福特同水晶宮幾支中下游球隊外,其餘球會都有一半或以上時間開「超短龍門球」,由企喺小禁區兩邊嘅隊友開始組織攻勢。
以往大腳開出嘅龍門球,控球權爭逐頂多係五五波,而用「超短龍門球」戰術,理論上可以容許後防從容組織攻勢,而當對手選擇喺前場進行緊逼,更加可以透過快速傳送突圍,交畀前鋒進行突擊,由於對方用咗唔少人力喺前場壓逼,防守人數減少下,突擊成功率自然大增。
當然,戰術重點在於「突破對手緊逼」,所以有足夠創造力球員同高質素前鋒嘅球會,都會選擇跟隨呢種潮流,但要做到曼城、利物浦嘅境界並唔容易,可以話係「富貴險中求」嘅一種戰術。
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。