菁英盃　鄭進泓：希望有一次踢足全場！

「菁英盃」B組周三（18）上演首場賽事，冠忠南區最終憑陳肇鈞的入球擊敗富力R&F。擁有多達7名U22球員的冠忠南區，是役派遣「自家製造」的鄭進泓後備上陣。

外號「沙維」的他在64分鐘入替劉穎笙，取得自升上一隊後首次上陣，雖然是「地標戰」，但他並未有怯場，謙稱自己仍有進步空間：「10分滿分嘅話，6分啦！始終自己第一次踢有啲緊張，有幾球可以再做好啲，左翼衞唔係自己熟悉嘅位置，位置感唔太好，所以畀自己6分。」他續指：「自己都冇諗過咁快有『地標』，雖然未必好好，但都唔係差太遠，希望證明到就算啱啱喺青年軍升上嚟，都有能力喺超聯立足。」

「沙維」剛在7月才協助南區U18成為聯賽、足總盃雙料冠軍，經過66天的等待，迎來職業生涯首次上陣機會，他期望：「希望有一次可以踢足全場，但係都知道自己體能未必追得上，亦都要踢得再有侵略性啲，無論打咩位都好，都要放膽踢！」