【人物誌】師承柏金亨利 完美9號的誕生

2019年09月22日 03:02
東網電視
更多新聞短片
(Getty Images/互聯網)
1場波入5球,強如美斯、C朗都好難做到,但荷蘭新星當耶爾馬倫就輕鬆完成,呢位20歲前鋒於早前荷甲,個人包辦5個入球,協助燕豪芬以5:0大勝維迪斯。
值得一提,當耶爾馬倫來自阿仙奴青年軍,2年前先至轉投燕豪芬,兵工廠真係走寶,白白放走1位新世代神鋒。
阿仙奴傳奇領隊雲格最愛發掘小將,2015年從阿積士青年軍簽入當耶爾馬倫,但雲爺爺竟然走漏眼,放走呢位「神童」。
當耶爾馬倫猶如武俠小說主角張無忌,受過唔少名師指點,佢8歲加入阿積士青年軍學踢波8年,期間獲得荷蘭名宿柏金教導,去到阿仙奴青年軍受訓,當時教練係亨利,當耶爾馬倫可以話盡得兩位超級射手真傳,堪稱完美9號,傳射能力俱佳,上場歐霸盃又入波。
當耶爾馬倫上季荷甲入10球嶄露頭角,今季更加進步神速,踢5場聯賽已入6球,而且喺早前歐國盃外圍賽,首次為荷蘭上陣就入波,擊敗勁敵德國,被譽為自雲尼斯達萊以來,燕豪芬及荷蘭最具潛力射手,周日(22日)晚荷甲大戰,燕豪芬主場對阿積士,當耶爾馬倫又準備大騷哥利。
照呢個勢頭,相信當耶爾馬倫將會成為各大豪門爭奪目標,問題係去皇馬、巴塞,定係巴黎聖日耳門。當耶爾馬倫師承柏金同亨利,會唔會考慮重返阿仙奴,證明自己呢?不過,就算當耶爾馬倫想入「廠」,恐怕阿仙奴依家都買佢唔起。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。