【賽後解碼】真魔獸!盧卡古4場入3球

2019年09月22日 04:43
東網電視
更多新聞短片
(Getty Images/法新社圖片)
周日(22日)凌晨意甲米蘭打吡,國際米蘭以2:0擊敗AC米蘭,國米新簽前鋒盧卡古又入波,佢今次發揮高空優勢頂入,取得個人今季聯賽第3個入球,同之前效力曼聯,簡直判若兩人。
盧卡古今場表現落力,開波17分鐘就幾乎建功,佢起腳勁射,僅被門將基安盧基當拿隆馬撲出。國米亦佔盡上風,拿達路馬天尼斯射門被撲出,迪岩布斯奧補射中柱。
國米下半場好快打開紀錄,波索域省中人入網,球證一度懷疑有人越位,但睇完VAR之後判入波有效。
踢到78分鐘,尼高路巴列拿左路傳中,盧卡古飛頂入網,佢今季踢4場意甲已經射入3球,率效極高。
盧卡古過去2季喺曼聯表現,一直備受批評,好多球迷話佢技術差,控波都控唔掂,又經常浪費機會。當國米教練干地不惜以7500萬鎊收購「渣古」時,唔少人都笑佢傻,亦紛紛叫盧卡古快啲走。
不過,盧卡古依家喺意甲,大放光芒,證明干地眼光獨到,難怪盧卡古入波之後,立即衝去同干地「激情」慶祝,幾乎想互咀。
「渣古」以往喺曼聯踢唔出水準,只係兩位主帥摩連奴同蘇斯克查唔識用佢,依家遇上「伯樂」干地,終於重生。
國米今季意甲4戰全勝,亦係唯一全勝球隊,睇來真係有力打破祖雲達斯壟斷局面。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。