【有片】藍斯入世界波!阿仙奴後悔未

2019年09月22日 05:00
東網電視
更多新聞短片
(Getty Images)
周日(22日)凌晨意甲,祖雲達斯以2:1擊敗維羅納,今季新加盟嘅艾朗藍斯首次為祖記於正式賽事正選上陣,並射入1球世界波,再次證明「免簽之王」祖雲達斯的確眼光獨到。
祖雲達斯今場20分鐘先失1球,幸好有艾朗藍斯建奇功,呢位威爾斯國腳離門30碼起腳省中人,令角度更加刁鑽入網。祖記多得呢球靚波,迅速扳平,打番起個勢,下半場初段再由C朗射入12碼反勝。
主角艾朗藍斯今場表現比C朗更搶鏡,佢上季同阿仙奴約滿,未獲續約,黯然結束11年兵工廠生涯,但祖記慧眼識英雄,早於今年2月已經斟掂藍斯今夏自由身加盟,並開出40萬鎊周薪,令佢成為史上最高薪嘅英國球員,一度令人懷疑呢位28歲中場值唔值呢個價。
艾朗藍斯因為受傷,缺陣今季首3場意甲,直至上場歐聯對馬體會先至復出,後備上陣。佢今場意甲擔正,仲射入救命波,以行動證明身價。唔知今季成績欠佳嘅阿仙奴,有冇後悔放走佢呢?
值得一提,艾朗藍斯以往入波之後,就有名人死亡,因而有「死神」之稱,佢今場射入加盟祖記嘅第1個入球,希望唔好造成傷亡啦。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。