【有片】旁證醉酒執法　連環仆倒極度滑稽

捷克1場青年足球比賽，發生罕見一幕，旁證施法拉竟然飲醉酒後，仍然負責執法，比賽期間，佢喺邊線企都企唔穩，來回跑步跟波時，更加連環仆倒，似足街邊醉酒佬，場面極度滑稽。

呢場比賽由Beroun對Slany，但主角唔係球員，而係旁證施法拉，從場邊人士拍到嘅片段所見，呢位「肥仔」旁證當時已經企唔穩，跑步時更加左搖右晃，跑唔到直線。

當施法拉追完波，跑回後時，最期待畫面出現，佢向前仆倒，想企番起身，但又再仆多一次，引到場邊笑聲四起。

兩位球場工作人員上前了解施法拉情況，想扶佢埋一邊休息，但佢竟然拒絕。工作人員惟有叫球證保錫克商議，最令人意外係保錫克竟然容許施法拉繼續執法，佢之後有冇再仆低，就不得而知。賽會事後表示，將會展開調查，可能會嚴懲施法拉。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。