普巴黑仔又傷過　曼聯鬥廠缺4大主力！

先完敗畀韋斯咸，主場鬥英甲下游羅奇代爾又被迫和，曼聯狀態曳到震，今輪硬碰大勇阿仙奴，仲有4大主力唔出得，魔迷肯定擰晒頭。周中對羅奇代爾踢足全場嘅保羅普巴，不幸足踝受傷，領隊蘇斯克查話佢傷處腫到豬蹄一樣，今仗勢將缺陣，睇嚟曼聯又要搵回晒塘嘅尼曼查馬迪頂上。

對羅奇代爾賽前，蘇B曾經表示普巴已經好番，對阿仙奴肯定會落場領軍，點知普巴一傷再傷：「好開心普巴可以復出對羅奇代爾，仲踢足90分鐘，呢個係好消息；但壞消息係佢足踝受傷，仲要腫晒，相信對阿仙奴都冇可能落場。」

除普巴外，上仗聯賽拉傷嘅拉舒福特、另一正選射手安東尼馬迪爾，以及左閘勞基梳爾都會缺陣，艾舒利楊格頂梳爾問題不大，但前線就大鑊，蘇B將迫住起用17歲嘅格連活特攻堅。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。