「返侯城啱你！」魔迷插到馬古尼刪帖

曼聯於歐霸盃唔爭氣，作客荷甲球隊阿爾克馬爾，只能同對手互交白卷，仲要衰到全場冇腳中龍，係曼聯隊史上於歐霸賽事中嘅首次（共25仗）。曼迷睇到愛隊冇神冇氣，依家對邊隊都冇甜頭，陣中全球最高身價後衞哈利馬古尼賽後唔識趣火上加油，最終得一個後場，就係畀球迷插爆。

曼聯於客場取得1分後，馬古尼於網上發帖，佢話：「作客取得1分，多謝球迷嘅支持，我哋喺星期日再見！」本身句嘢都冇乜問題，但曼迷火遮眼即時向馬古尼發炮：「大佬，你睇吓曼聯對邊隊先啦！」、「你真係覺得賽果OK？」、「你唔係踢緊侯城呀！」、「你咁樣嘅思想，都係返侯城罷啦，嗰度啱你踢呀！」

馬古尼見群情洶湧，好快就無可奈何之下刪帖。曼聯前隊長堅尼早前話，今夏曼聯引入嘅3個球員表現係唔錯，但佢哋都唔係踢開頂級球隊，於心態上唔慣場場贏波，將會對曼聯產生負面影響。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。