【有片】基拿比堅勁 超班玩謝阿根廷

2019年10月10日 04:37
東網電視
更多新聞短片
(美聯社)
國際足球熱身賽,德國主場鬥阿根廷,基拿比再一次用行動證明堅有卡士,玩到阿根廷後防一戙都冇!呢名拜仁翼鋒早前轟入熱刺4球,唔少人都質疑佢只係好彩,但今仗上半場佢簡直有超班之勢,貢獻1入球、1助攻,雖然最後德國被追成2:2平手,但基拿比一樣係光芒四射。
着起20號波衫,梳咗個菠蘿頭嘅基拿比,今仗活躍於右路,一開波就走上走落,不斷利用速度進襲阿根廷後防,另外祖利安白蘭特亦好搶鏡,開波冇耐就遠射中龍,不過被門將救出。德國上半場瘋狂打快速反擊,15分鐘基拿比於幾個敵衞圍住之下,快對手門將一步挑射入網,德國領先1:0。22分鐘阿根廷炸彈後防馬高斯盧祖於邊線扭波扭出禍,高路斯達文偷到個波大步推前,之後交畀基拿比,佢面對奧達交迪同急於回防嘅守衞,竟然搵到私家路傳個靚地波,夏維斯門前輕鬆射成2:0。德國之後仲有侯斯頓保左腳勁轟罰球中楣。隨後阿根廷還以顏色,迪保羅離門25碼勁射中柱,半場德國領先2:0。
阿根廷今戰冇美斯助陣,以為保羅戴巴拿可以做番齣好戲,點知成場唔見影,62分鐘就被換入,而基拿比亦於70分鐘左右被換走。阿根廷幾個後備球場扭轉戰局,其中利華古遜前鋒艾拿利奧堅搶鏡,66分鐘佢接應左路高波傳中,無人看管下獅子搖頭頂入遠柱,之後佢2次於禁區內起腳都有威脅。85分鐘阿根廷追平,艾拿利奧於禁區帶生個波跟手分畀奧甘波斯,呢名西維爾中場勁射省中安利簡恩入網,最終雙方打成2:2平手完場。
立即參加「賞您睇」:https://tinyurl.com/yxa3a8z8 
Click下面粒掣,儲on.cc coins!機票、家電、超市禮券、過萬份獎品等緊你。