喺曼聯未衰夠！盧祖派膠累阿根廷

講得好聽啲就通天老倌，唔好聽就個個位都係後備，曼聯守衞馬高斯盧祖，於零狀態下仲可以入選阿根廷國家隊，下場只得一個，就係出醜。呢名29歲守將，於國際賽鬥德國正選上陣，於後防騰騰震又鍾意扭，最終雞手鴨腳被偷甩皮球予德國反擊機會，直接累「藍白兵團」失第2個波。

盧祖喺俄羅斯世界盃表現不過不失，鬥尼日利亞攻入致勝入球助球隊出線係有功勞，但呢名守衞攻守都只係半桶水，阿根廷始終要重用佢，睇到「藍白兵團」人才凋零；到半場領隊史卡朗尼終於頂唔順換走佢，睇到佢有幾唔滿意盧祖。佢今季於曼聯徹低成為後備，早前於歐霸盃又無啦啦整個後腳交叉傳送，成為全球笑柄，阿根廷一日要用佢，一日就冇運行。

立即參加「賞您睇」：https://tinyurl.com/yxa3a8z8　

Click下面粒掣，儲on.cc coins！機票、家電、超市禮券、過萬份獎品等緊你。