VVD失準又點?1球員可幫佢重上巔峰

20191011
東網電視
更多新聞短片
(Getty Images)
利物浦能成為歐洲王者,中堅華基爾雲迪積克功不可沒,佢勁到榮膺歐洲最佳球員,仲成為金球獎得獎大熱,反映呢名守衞有幾犀利。但本季利物浦後防失球顯著增多,VVD整體表現亦冇上季咁好,但利物浦前射手希斯基認為,只要1人復出、紅軍後防就會零漏洞,佢就係巴西門神艾利臣比加。
利物浦上季38場聯賽僅失22球,場均失波僅為0.58球;但今季8戰已失6球,雖依然係英超本季失波最少球隊,但場均失球數字已升至0.75球。喺歐聯主場鬥薩爾斯堡,利物浦更於短時間內勁失3球,VVD被批評跌Watt不無道理。
但希斯基認為紅軍後防根本未齊章,VVD失準亦正常:「佢上季幾乎係零失誤,要做到真係好難。VVD已成為眾矢之的,每個射手都會出盡百分百能力去對付佢,VVD當然係難頂。事實上雖然VVD整體表現不及上季,但依然好出色。同埋只要艾利臣比加復出,都會幫助到VVD重上高峰。艾利臣係全球最佳門將之一,利物浦有佢助陣,就好似踢多個後防一樣,而且佢能力出眾,令紅軍防線更冇後顧之憂,到艾利臣復出,利物浦失波必定減少。」
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。