高普冧莊每月最佳領隊　最佳球員有佢

雖然到咗國際賽期，不過英超就趁今日空檔公布咗9月份嘅最佳領隊同球員，其中帶領利物浦以8戰全勝排榜首嘅領隊高普，就理所當然冧莊攞最佳領隊。單係9月份，「紅軍」踢咗4場英超全勝，包括打敗般尼、紐卡素、車路士同錫菲聯，合共攻入9球僅失2球，認真犀利，其他好似林柏特同羅渣士等本身領軍表現都唔曳，但拍埋高普側邊都仲差多少囉！值得一提，今次係高普歷來第5次獲得英超每月最佳教練，亦係佢今季嘅第2次。仲有，如果「紅軍」嚟緊作客贏埋曼聯，仲會追平埋曼城嘅18連勝英超紀錄，都唔到你唔服佢。

最佳球員方面，就由阿仙奴射手奧巴美揚奪得，佢成功擊敗咗阿歷山大阿諾特同奇玲迪布尼等攞獎。呢位加蓬射手喺9月份踢4場英超入咗5球，仲要球球都重要。呢次係奧巴美揚第2次攞英超每月最佳，而阿仙奴隊史入面，就只有柏金、亨利同尹佩斯比佢贏得更多。

立即參加「賞您睇」： https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。