【有片】接受唔到！謝拉特做利物浦敵人

國際賽期間，蘇格蘭舉行咗一場好夠噱頭嘅慈善賽，由格拉斯哥流浪名宿隊迎戰利物浦名宿隊，單睇呢個牌頭，就知呢場波又叫「謝拉特表演賽」啦！

貴為利物浦永遠英雄，謝拉特今場率領加歷查、古積特、格連莊臣、貝加、杜迪克、路爾斯加西亞等「紅軍」名將上陣。利物浦有路爾斯加西亞同貝加早段入波領先2球，格拉斯哥流浪嘅基斯保迪喺25分鐘追番1球，不過謝拉特1分鐘後交出靚助攻，畀希斯基射成3比1，「格流」之後再有盧雲基蘭斯入波，但利物浦名宿隊仍以3比2獲勝。

謝拉特今場重披「紅軍」波衫，踢到75分鐘就退下火線，全場球迷都起立鼓掌，謝拉特被換走後直接返入更衣室，再喺81分鐘改着佢依家執教嘅格拉斯哥流浪波衫上陣，成為利物浦嘅對手，呢個畫面球迷想像得到嗎？

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。