麥迪臣稱病唔踢歐國外 轉頭去賭場搏命!

2019年10月13日 12:00
東網電視
更多新聞短片
英格蘭近年新星輩出,成績亦穩步上揚,不過球員嘅紀律問題似乎冇辦法解決。英格蘭日前喺歐國外意外輸畀捷克後,再爆出樣衰醜聞!被視為英格蘭中場未來揸Fit人嘅占士麥迪臣,喺對捷克前突然宣布因病退隊,英格蘭「處女戰」被逼押後。不過,呢位病到連國家隊首演機會都唔要嘅球星,退隊後居然被發現精神奕奕咁喺賭場內搏殺,真係辛苦晒呀!
英國《太陽報》爆料,占士麥迪臣喺英格蘭大軍出發前,宣布因病退隊,不過佢並唔係返屋企養病,亦冇打算睇呢場英格蘭出線關鍵戰嘅直播,而係直接去到萊斯特市一間賭場,笠住帽鬼祟出現,拎住幾疊籌碼喺賭台上面認真搏殺,但報道冇講佢係咪好似英格蘭咁輸鑊甘。
消息指今次醜聞曝光後,占士麥迪臣嘅英格蘭前途將受到好大打擊,因為領隊修夫基本身對呢位李斯特城中場嘅紀律問題有保留,佢之前踢英格蘭U21嗰陣,已經被教練團視為「麻煩友」,無論生活方式同性格都「唔得人鍾意」。
雖然紀律差,但22歲嘅占士麥迪臣今季表現實在出色,英格蘭國家隊最缺乏嘅就係佢呢種腳法一流、視野廣闊嘅創造型中場,唔少球迷視佢為英格蘭「救世主」,不過修夫基願唔願意處理多一個「問題球星」?
立即參加「賞您睇」:https://tinyurl.com/y2e6pmwk 
Click下面粒掣,儲on.cc coins!機票、家電、超市禮券、過萬份獎品等緊你。