【東體爭議】利物浦10年最強陣冇謝拉特

英超矚目大戰「雙紅會」前，前英格蘭國腳米斯喺「雙紅11人」入面全揀利物浦球員，成為球迷熱話。足球網站《Goal》日前亦評選利物浦過去10年最強陣容，結果只係得蘇亞雷斯一個非現役「紅軍」入選，其餘10個位置都係依家嘅球員，莫講話加歷查、菲臘比古天奴冇份，連「神奇隊長」謝拉特都名落孫山呀！

利物浦依家防線攻守兼備，全數入選10年最佳應該冇乜爭議，「埃及文明」組合上榜亦係順理成章，但係《Goal》為咗加埋蘇亞雷斯入去，夾硬將羅拔圖法明奴擺去進攻中場位置，不過講到最具爭議，就係佢哋寧願要法賓奴泰華利斯，忍痛放棄謝拉特。

《Goal》解釋話：「講到足球才華，謝拉特係利物浦史上最佳中場，呢一點無可爭議，不過法賓奴證明佢係精英防守中場，擁有怪物級體能、偉大傳波技術同一流嘅心理，佢係利物浦重心，將會為利物浦贏得更多錦標。」

立即參加「賞您睇」：https://tinyurl.com/y2e6pmwk　

Click下面粒掣，儲on.cc coins！機票、家電、超市禮券、過萬份獎品等緊你。